Қалада қант тапшылығына қатысты қарбалас бәсеңдеді. Сауда желілеріне шекер күнделікті жеткізіліп тұрады. Кеше ҚР Сауда және интеграция министрлігі де елімізде қант тапшылығы жоқ екенін хабарлаған еді. Бұл ретте шикі қанттан қант өндіру және оның импорты жалғасуда. Елдегі қорлар үнемі толықтырылып отырады. Яғни, үш айдан кейін қор таусылып, қант тапшылығы болады деген ақпарат шындыққа жанаспайды. Әрі кейбіреулер көтерме сауда нүктелерінен шекерді көп мөлшерде арзан бағамен сатып алып, үстеме ақы қосып сатқан. Сондықтан, бұл алып-сатарлардың да арам пиғылын жүзеге асыруға шектеу болмақ. Сауда желісі қызметкерінің айтуынша, әлеуметтік маңызы бар тауарлар қоймалардан үздіксіз жеткізіліп тұрады. Әсіресе шекер күнделікті сұранысты қанағаттандырады. Мәселен, бүгін мұнда 5 тонна қант әкелінді. Өз кезегінде тұрғындар қантты жаппай сатып алуының себебін бағаның артуымен байланыстырады. Себебі, Ресей қант пен ұн экспортына шектеу қойғалы өңірде шекер келісінің бағасы 310 теңгеден 369 теңгеге артқан болатын. Еліміздің Ұлттық статистика бюросының мәліметтері бойынша, өткен аптада әлеуметтік маңызы бар азық-түлік тауарларының бағасы 0,2 %-ға өсті. Бәрінен бұрын қырыққабат -1,6%-ға, қант 0,6%-ға және картоп 0,5%-ға қымбаттады. Өңірлер бөлінісінде бір апта ішінде бағаның ең жоғары өсуіне Маңғыстау облысында жол берілген. Атап өтейік, еліміздің сауда және интеграция министрлігі жергілікті атқарушы органдармен бірлесіп азық-түлік өнімдерінің бағаларын бақылау, оның ішінде сауда субъектілерінің рұқсат етілген сауда үстемесін сақтауы бойынша тұрақты жұмыстар жүргізуде.