Қаламызда қант бағасы әр дүкенде әр түрлі. Ірі дүкендер желісінде шекердің келісі 270 теңге болса, көтерме саудамен айналысатын кіші сауда орындарында қант бағасы 238 теңгеден басталады. Бірақ, соңғы 2-3 күнде кей көтерме дүкендердің сөрелерінде қанттың болмауы, қолжетімді бағаға үйренген тұрақты тұтынушыларды тығырыққа тіреген сыңайлы. Тосап қайнатып, қысқа азық әзірлеуге кіріскенде  қымбатшылық көлденең килікті. Бұл жылда қайталанатын көрініс екені жасырын емес. Гипермаркет пен супермаркеттердегі шекер Алматыдағы "Ортаазиялық қант компаниясы" ЖШС-нің өнімі. Зауыттан шыққандағы бағасы 246 теңгеден  7 вагонға тапсырыс берілген. Оның бірі қаламызға келіп жетті. Ал шағын дүкендердегі қанттар көбіне молдавиялық өнім. Бағадағы айырмашылық осыдан дейді қалалық кәсіпкерлік бөлімінің басшысы Анар Даржанова. Қантты тонналап сатып алып, қант бағасын шарықтату үшін жасанды тапшылық тудыратын кәсіпкерлердің әрекетіне жол берілмейді. Бірақ, алдағы уақытта шекер қымбаттап жатса, бұл тек қант зауыттарына шет елдерден әкелінетін шикізат - қант құрағының бастапқы бағасының өсуіне байланысты  болуы мүмкін, -дейді Анар Даржанова. Айта кетейік, қалаға 68 тонна қант жеткізілді. Тағы бір вагон жолда.