Қалада қаңғыбас ит көп
Шаһардағы өзекті мәселелердің бірі - қаңғыбас иттер. Көшеде ит-мысықтар қаптап жүр. Жеңіс даңғылындағы №24 үйдің тұрғыны Любовь Алиева редакциямызға шағымданды. Зейнеткердің пәтерінің терезесі көшеге қарайды. Үй маңындағы шағын бақта иттердің үйірімен жүретінін жиі байқайды екен. Любовь екі жағдайды еске алды: бірінде иттер балмұздақ ұстаған екі қызды қоршап алса, енді бірде балалы әйелдің соңынан еріп жүрген. Абырой болғанда, иттер ешкімге шабуыл жасамаған, бірақ олардың көптігі тұрғындарды, әсіресе балаларды қорқытады. Күн суытысымен бұралқы иттер көше қаңғиды. Тамақ іздеп, тентіреп жүрген жануар көп. Қала тұрғындары үй арасында үйірімен жүретін иттерден қорқып қалған. "Мектепке баратын балаларға тап бере ме" деп үрейленеді. Любовь Алиева мәселені өз қолына алып, өз және көрші үйлердің тұрғындарынан қол жинап, ветеринарлық қызметке бірнеше өтініш жазған. Алайда оған «иттер чиптелген» деген жауап келіпті. Любовь қала әкімдігінен мұндай иттердің ұсталуын бақылауға алуды сұрайды. Шаһарда кезбе жануар өте көп. Олар әр ауданда үйірімен жүреді. Көп қабатты тұрғын үйлер мен дүкендердің маңынан азық іздейді. Тіпті мектеп аулаларында жиі жүреді. Облыстық ветеринария басқармасының мәліметінше, биыл кезбе жануарларды ұстау және чиптеу үшін 100 миллион теңге бөлінген. Оның 57 миллионы ит пен мысықты ұстауға, 34 миллионы – оларды күтіп-бағуға, 2,5 миллионы – чиптеуге және 6,4 миллионы – стерилизациялауға жұмсалған. Жыл басынан бері аймақта 20 500-ден астам қаңғыбас ит және 500 бас мысық ауланған. Оның ішінде шаһард 16 454 бас ит ауланған. Басқарма өкілінің сөзінше, күннің салқындауына байланысты өтініш те көбейген. Кезбе жануарларды аулау кезекті кесте бойынша 13–18 қазан аралығында жүргізіліп жатыр. Оған 11 маман қатысады. Аулау жұмыстары ПД және Астана, Алматы аудандарының әкімдіктерімен бірге жүргізіледі. Биылғы жылдың басынан бері Ақтөбеде уақытша ұстау пунктіне 2 668 кезбе жануар жеткізілген, олардың 2 168-і – иттер. Біздің өтінішімізден кейін Жеңіс даңғылы бойынан 5 ит ұсталғанын ветеринарлық қызмет мамандары хабарлады. Олар өз рейдінің бейнежазбасын да жіберді.Количество показов: 15
Дата создания: 18.10.2025 08:35:56
