Қала әкімі Асхат Шахаров аптасына екі рет тұрғындармен тұрақты кездесу өткізіп тұрады. Асхат Шахаров пен "Астана" ауданының әкімі Мамырғали Аққағазовтың жұртшылықпен кезекті кездесуі бүгін № 26 мектепте өтті. Олар Тұрғын қалашығы, Шанхай ауданының тұрғындарының сауалы мен өтініштерін тыңдап, қалыптасқан мәселелерді бірлесе шешу жолдарын талқылады. Астана ауданы әкімі Мамырғали Аққағазов халыққа есеп берді. Оның айтуынша, "Халық қатысатын бюджет" жобасы аясында тұрғындардан 2020 жылы келіп түскен 10 жоба іске асырылған. Жаңақоныс, Құрашасай, Сазды тұрғын үй алаптарында және «Айболит» бау-бақша ұжымында 6 балалар ойын алаңы мен спорт алаңдары салынып, 2 ойын алаңы жөндеуден өткізіліп, қолданысқа берілді. Қала ішіндегі 33 көшедегі мүмкіндігі шектеулі азаматтарға арналған өткелдерді қайта жаңарту жұмыстары атқарылды. Биыл 11 жоба жүзеге асырылады. Мердігер мекемелер анықталып, жұмыстарын бастады. Бұл жобаларға 146 млн теңге қаражат бөлінді. Ағайынды Жұбановтар көшесіндегі № 300-304 үйлерінде, Жаңақоныс тұрғын алабындағы №5 үй, Батыс-2-дегі №16 көп қабатты үйдің ауласына, "Қанағат" тұрғын алабына балалар және жасөспірімдер ойын алаңын орнату, Сазды тұрғындар алабында саябақ салу және №47, №19, №20, №39, №10 орта мектептерге дейін жаяу жүргіншілерге арналған тротуарлар салу жұмыстары жоспарланған.Тұрғындар әкімдерге сауалы мен өтініштерін айтып, мәселелерді шешуді сұрады. Жиынға келгендердің бірі қоғамдық көліктің жетіспеуіне шағымданса, басқасы қаңғыбас иттердің көшеде толып кеткенін айтты. Тұрғындар бұралқы иттер балаларды қауып ала ма деп қорқады. Аудан әкімі тұрғындардың шағымдарын тыңдап, жақын арада шешуге уәде етті. Ал қоғамдық көлік бойынша, қалада 4 тасымалдаушы бар. «Автопарк» ЖШС, «Жолаушылар автокөлік кәсіпорны" ЖШС, «Qala Trans» және «Ақжайық Автопарк» компаниялары. Осы тасымалдаушылар арқылы 46 бағыт бойынша 387 қоғамдық көлік қатынайды. Мамырғали Аққағазов алдағы жоспарлармен де бөлісті. Аудан бойынша ағымдағы жылы 21 көшеге орташа және күрделі жөндеу жұмыстары жүргізілетін болады. Бейбітшілік даңғылындағы автомобиль жолының 515 метр бөлігі жөнделіп жатыр. Тургенев, Қалдаяқов көшелерінің Бейбітшілік даңғылына дейінгі 1400 метр бөлігінде де жөндеу жұмыстары басталған.