Қаламызда үш айлық сенбілік өтіп жатыр. Әр сенбі сайын қала тұрғындары аулалар мен көшелерді тазартып, қыс бойы жиналған қоқыстан арылуы керек. Өткен сенбіде ақтөбеліктер 5-ші сенбілікке шықты. Дегенмен шаһардағы кей аудандарда қоқыс тау болып үйіліп жатыр. Лачугин мен Киселев көшелерінің қиылысындағы мына қоқыстың жатқанына көп болған. Тамақ қалдықтарынан бастап қатты тұрмыстық қалдықтарға дейін шашылып жатыр мұнда. Тау болып үйілген қоқыстың қасына жақындау мүмкін емес. Жағымсыз иіс мүңкіп тұр. Ал, қоқыс жәшігі тұрғын үйлерге жақын орналасқан. Тұрғындар тазалыққа жауапты мекеме қызметкерлерінің жұмысын атқарып шаршадық дейді. Себебі, қоқысты алса да айналасына шашып кетеді екен. Аула мен көше толған пакеттер мен қағаздар. Ливенцов көшесінде де жағдай мәз емес. Мұнда да қоқыс жәшігі үнемі толып тұрады. Тұрғындар аулаларын өздері тазартқанымен еңбегіміз еш дейді. Арнайы көлік келіп қоқысты жинағанымен, айналасы шашылып жатады. Аулалардағы тазалыққа қалалық тұрғын үй-коммуналдық шаруашылығы бөлімі жауапты. Мұндағылардың сөзінше, бүгінге дейін тұрғын үйлердің қоқысын шығарып жүрген "Ақжол ЛТД" ЖШС-і қызмет көрсетуден бас тартқан. Ал, олардың қызметі үшін ақы төлеп қойған ақтөбеліктердің ақысын кім қайтаратыны белгісіз. Өткен сенбіде шаһардан шыққан 160 тоннадан астам қоқыс арнайы алаңға жеткізілген. 15-наурызда басталған тазалық акциясы 5-рет ұйымдастырылды.