Шаһарда әлі де қоқыстың жыры. Қала тағы да қоқысқа толды. Қай ауданды араласаңыз да жәшіктен асып төгіліп жатқан тұрмыстық қалдықтан аяқ алып жүру мүмкін емес. Тұрғындардың айтуынша, бұл үйреншікті көрініске айналған. Қоқыс жинаушы компаниялар апталап қоқыс шығармауды әдет қылған. Бұл ескі қаланың орталығындағы Уәлиханов көшесі бойында орналасқан тұрғын үйлердің ауласы. Тұрғындар бір аптадан бері қоқыс жинайтын техниканы күтіп жүр. Қоқыс жәшіктеріне сыймай, тұрмыстық қалдықтар тасып-төгіліп жатыр. Қоқыстың үйіліп жатқанынан қоқыс шығарушы компания хабардар. Қоқыс алынады деп уәде де беріп үлгерген. Қаланың ескі бөлігінің тұрғындары күн ұзағына қоқыс шығарушы серіктестіктер үстінен арызданып қалалық тұрғын үй-коммуналдық шаруашылығы, жолаушылар көлігі және автомобиль жолдары бөліміне қоңырау шалғанымен еш нәтижесіз. Жұртшылық кешелі бері қар жауғалы қоқыс алаңдары ақ ұлпаның астында қалғанын айтады. Жығылған үстіне жұдырық болып жағдайлары қиындаған. Кейбірі жүрер жерлерін қолына күрек алып аршуға кіріскен. Жергілікті әкімдік қоқыстың мәселесін тарифті көтеру арқылы шешеміз деп былтыр жыл аяғында уәде берген болатын. Бірақ, мәселе шешімін таппағанға ұқсайды. Халықтың пікірі жауапты шенеуніктер қоқысқа толған шаһардың жайына бас ауыртпайды дегенге саяды. Сондықтан тұрғындар мәселелерін облыс әкіміне жеткізуге бел буып отыр.