Санитарлық нормаларды бұзып, рұқсат етілмеген жерлерде сауда жасаумен  айналысқан сатушыларға айыппұлдар салынды. Бүгін қала әкімінің орынбасары Жандос Байырханов бастаған топ орталық базар маңына рейд жүргізді. "Астана" сауда үйінің алдындағы кей дүңгіршектер жабық. Саудасы күнделікті қызып тұратын бұл нүктелердің иелері камера мен микрофонды көре сала ертерек табан жалтыратқан сыңайлы. Алайда асыққандары соншалық  ұялы телефондарын қалдырып кеткен. Кезек қуырылған тауық аяқтарын сататын мына сауда орнына да жетті. Тәртіп сақшыларының түсіндіруінше, бұл дүңгіршек  ұн өнімдерін сататын  дүкен ғимаратына жалғанған. Ал орналасқан жері сол дүкеннің аумағы болып есептеледі. Сондықтан  ескертуді басты  ғимарат иелері естіді. Орталық базар аумағындағы қауын-қарбыз сатушылардың санитарлық кітапшалары болмай шықты. Рейд үстінен түскен базар басшысы Асқар Ермаханов өз ойын айтып, қала әкімінің  орынбасары Жандос Байырхановпен келісімге келді. Салқын сусын мен квас сатушылардың да санитарлық кітапшалары болмай шығып, тәртіп сақшылары аптапта шөл басатын сусындарды бөшкелеп тәркіледі. Айта кетейік, бұндай рейдтер мамыр айынан бері тұрақты түрде жүргізіліп келеді.