Облыстың орталығындағы "сақалды" құрылыстар биыл аяқталады. Қоғамдық көлік қатынасы, қоқыс шығару мәселесі реттеледі. Қала іргесінде жаңадан пайда болып жатқан елді мекендер инфрақұрылымы кезекпен шешіледі. Шығармашылық академиясында бүгін шаһар басшысы Мавр Абдуллин ақтөбеліктер алдында қорытынды есеп беру жиынын өткізді. Шаһар басшысы қорытынды есеп беру жиынын былтырғы тындырылған істерден бастады. Өткен жылы бюджет кірісі 41,4 миллиард теңгеге жетті. Жоспар 100,3 пайызға орындалды. Шығыс бөлігі 99,5 пайызға орындалған. Өнеркәсіптік өнім өндіру көлемі 502 миллиард теңге. Негізгі капиталға тартылған инвестиция көлемі 200 миллиард теңге. 25 миллиард теңгеге 8 жаңа жоба жүзеге асып, соның арқасында 1700 ақтөбелік жұмысқа орналасқан. Биыл да осындай жұмыстар жалғасады. Сондай-ақ, президент Қасым-Жомарт Тоқаевтың тапсырмасымен отандық кәсіпорындарға жан-жақты қолдау көрсетілетін болады. Халықтың әл ауқатын көтеру үшін бұл атқарылып жатқан жұмыстар маңызды. Ал қоғамдық көлік қатынасы, тұрмыстық қалдықтарды шығару секілді күнделікті күйбең тірлік қарапайым тұрғынның басты проблемасы. Газ, су, жол мәселесі де қалада әлі өзекті болып тұр. Қала іргесі күн санап кеңейіп жатыр. Жаңа қоныстар пайда болды. Жергілікті билік саны көбейген елді мекендерді инфрақұрылыммен қамтамасыз етіп үлгермей жатыр. Іргеден үй соққандар өркениетке тез іліксек деген өтінішін айтады. Ақшат ауылында да осыған ұқсас жағдай. Ал елді мекендерге жол төсеу уақыт пен қаржыны қажет етеді. Бұл мәселе кезекпен шешіледі дейді қалабасы. Сондай-ақ, жиында Сәңкібай батыр даңғылының тұрғындары сөз алды. Көшені қайта жарақтандыру жұмыстары жүргізіліп жатыр. Даңғыл тұрғын үйлер орналасқан тарапқа қарай екі жолаққа кеңейтілмек. Жоба бойынша салынғалы жатқан жол үйлерге 5 метрге дейін жақындап, 1000-нан аса тал-терек оталуы керек. Тұрғындар оған түбегейлі қарсы. Кездесуге жеке сұрақпен келгендер де бар. Оларды жиыннан соң Мавр Абдуллин бөлек қабылдады. Кәсіпкерлер жер телімін сұраса, көпбалалы аналар баспанаға зәру.