Алға балалар үйі мен Қобда аудандық отбасылық үлгідегі балалар үйі түлектерінің пәтер алуға жинап жатқан қаржыларына бүгін ақша қосылды. Қала әкімі Ілияс Испанов "Мейірім" жастарды әлеуметтік бейімдеу орталығында Тимур Ақиев пен Дарья Фырфаның әрқайсысына 700 мың теңгенің сертификатын табыстады. 700 мың теңгелік серитификат алғандардың бірі - Тимур Ақиев. Қобда аудандық отбасылық үлгідегі балалар үйінің түлегі. Қазір отбасылы, екі баласы бар. Пәтер жағалап жүргендіктен өз баспанасының болғанын армандайды. 5 жыл бұрын "Тұрғын үй құрылыс жинақ банкінен" шот ашқан. 2 немесе 3 бөлмелі пәтер алу үшін қажетті қаражатқа 1 миллион теңге жетпей тұр. Ал, Дарья Фырфа Алға балалар үйінің түлегі. 2010 жылдан бастап баспана алу үшін ақша жинай бастаған. Отбасылы. "Достық" жүзу орталығында жаттықтырушы болып қызмет етеді. Шаһар басшысы Дарьяға да 700 мың теңгенің сертификатын табыстады. Ал "Мейірім" жастарды әлеуметтік бейімдеу орталығында 102 жас тұрып жатыр. 62-сі жұмыс істейді, қалғандары колледж, университеттерде білім алады. 16-29 жас аралығындағы балалар үйінің түлектері үшін барлық жағдай жасалған.