"Бір жарық сәуле". Облыстық "Алақай" қуыршақ театры бастаған жаңа жоба осылай деп аталады. Театр әртістері осы жоба аясында мүмкіндігі шектеулі бала тәрбиелеп отырған отбасылардың үйлерін араламақ. Бүгін "Алақай" қуыршақ театрының ұжымы Кирилюктер отбасына барды. Балалар "Ғажайып қолшатыр" атты 1 сағаттық қойылым барысында ертегілер әлеміне саяхат жасады. Әртістер сахналық киімдері, декорация мен қуыршақтарын ала келген. Балалар бір марқайып қалды. 12 жастағы Гена мен 10 жастағы Кириллдың балалық шағы осылай өтіп жатыр. Олар өзге балалар сияқты аулада доп қумайды, мектепке де бармайды. Тәулік бойы пәтерден шықпайды. Ағайындылардың диагнозы- "Дюшен бұлшық еті дистрофиясы". Тұқым қуалайтын аурудың әзір емі жоқ. Өздігінен жүріп-тұра алмайтын балаларды №27 мектептің мұғалімдері үйге келіп оқытып жүр. Енді "Алақай" қуыршақ театрының ұжымы қаладағы барлық мүмкіндігі шектеулі балалардың үйін араламақ. Мұндағы мақсат - үйден ұзап шыға алмайтын мүгедек балаларды қуанту. Аз да болса, балдырған шақтың қызығын көрсету.