Жаңа Әлжан ұн комбинатынан 3 шақырымдай қашықтықта орналасқан ауыл 25 жылдан бері көгілдір отынсыз отыр. 1990-жылдары құрылған шағын ауылдың нақты атауы жоқ. Бірақ, облыс орталығына қарайды. Қыстың ызғарында үйлерін көгілдір отынмен жылыту мұндағылардың басты арманына айналған. 25 жылдан астам уақыт ағаш пен көмір жағады. Үйлерінде қариялары мен балалары барлар қыста қатты қиналамыз деп отыр. Газбен баспаналарын жылыту үміті осыдан екі жыл бұрын пайда болған. Газ құбыры жүргізіліп, ауылға газ тарату бекеті салыныпты. Алайда, нәтижесіз. Газ құбырларын тұрғындардың сөзінше, "ҚазТрансГазАймақ" АҚ тартқан. Көгілдір отынсыз отырғандарын айтып, қалалық та, облыстық та әкімдіктердің табалдырықтарын тоздырыпты. Мәселе әлі шешілмей отыр. Бірнеше жерден кемшілік тапқан мамандар жөндеу жұмыстарын да аяқтаған. Көгілдір отын биыл беріледі деп сенгендер қыстың қамына әлі кіріспеген. Аздап ағаш жинағандары болмаса, көмір алып үлгермеген. Сапасы нашар қара отынның да бағасы жыл сайын көтеріледі. Биыл 1 тоннасы 16 мың теңге. Кей тұрғындар үйлерін жылыту үшін қыста 15 тоннаға дейін көмір жағады. Шамамен 300-400 мың теңге аралығында шығындалады. Ал, газ құбырын кіргізушілерге 200 мың теңге берген. Көгілдір отын қосқандары үшін тағы 50 мың теңгедей ақша төлейді. Ауыл тұрғындарының арасында қыстың аязында баспаналарын тастап, қалада пәтер жалдап тұратындары бар. Себебі, ауырсаң не дәрігер, не дәріхана жоқ мұнда. Ауыл облыс орталығына қарайды. Қалалық сәулет және қала құрлысы бөлімінің басшысы Асылбек Әлімбаевқа хабарластық. Алайда, ол бұл мәселе бойынша жауап беруден жалтарды. Шенеуніктер аудан орталықтарын түгел көгілдір отынмен қамтыдық деп есеп берсе де қаланың ішіндегі 10 үй тыс қалып отыр. Ал, осы ауылдың маңында үш ауданды бірдей газбен қамтитын газ тарату бекеті орналасқан.