Қалаға алғашқы, қалың қар түсті. Тазалыққа жауапты мердігер мекемелер сайлаған техникаларын шығарып, қызу жұмысқа кірісті. Қаламыздың орталық көшелерінде, оның ішінде Әбілқайыр хан мен Ә.Молдағұлова даңғылында 10-ға тарта техника қар аршыды. Қазіргі уақытта жұмысшылар көлік жолдары мен тротуарларды тазартып жатыр. Ол үшін әрқайсысы 6-7 адамнан тұратын 15 жұмыс бригадасы жұмылдырылған. Түнгі уақытта қала көшелеріндегі көпірлерді, жол қиылыстарын және көпір жанындағы алаңдарды арнайы сыпыру техникасымен тазалау ұйымдастырылды. Ал бүгін күндіз Әбілқайыр хан мен Ә.Молдағұлова даңғылдарының қарын аршуды "АқЖол ЛТД" компаниясы атқарды. Қыс бойы қардан тазартылатын учаскелердің жалпы ауданы 5,9 миллион шаршы метрді құрайды. Оған қала қарауындағы 711 көше, айналма жолдар және 53 тұрғын массивтің жолдары кіреді. Ағымдағы жылы жолдарды күтіп ұстау үшін 10 мердігер кәсіпорын жұмылдырылған. Барлығы 190 бірліктен астам арнайы техника тартылды. Сонымен қатар, бүгінгі таңда мердігер ұйымдардың көктайғаққа қарсы материалдар қорын 650 тонна тұз, 1600 тонна құм-тұз қоспасы және 1000 тонна құм құрайды. Сондай-ақ, Ақжар-2 аумағында және қатты тұрмыстық қалдықтар полигоны ауданында қар төгуге арналған 2 полигон бекітілген. Айта кетейік, келесі жылдан бастап автожолдарды қыста күтіп ұстау бойынша мердігерлермен 3 жылдық келісімшарт бекітілетін болады. Яғни, әр компания күтіп ұстау бойынша міндеттеме алған жолға 3 жыл бойы өзі жауапты болады.