Ақжар-2 ауылында "Ақбұлақ" АҚ-ның 2 мыңнан астам тұтынушысы бар. Қала іргесінде орналасқан ауыл тұрғындары бірнеше жылдан бері ауыз судың тапшылығын көріп отыр. Соңғы бір аптада жағдай мүлдем нашарлап, жұрт жуынып, тамақ пісіруден қалған. Ашулы халық бүгін наразылықтарын білдірді. Тұрғындардың сөзінше, Алматы ауданының әкімі Алмас Әлімбаев мәселе 3 күн ішінде шешіледі деп уәде берген.Ақжарлықтар ауыл шетіндегі бұлақтан күнде ішуге су тасиды. Ал, "Ақбұлақ" АҚ баспасөз хатшысы Динара Жаналинаның айтуынша, Ақжар-2 ауылында 4 су ұңғымасы бар. Төртеуінде де су айдайтын құрал үздіксіз жұмыс жасайды. Екі су ұңғымасы былтыр жаңартылыпты. Қазір "Ақбұлақ" АҚ мамандарынан құралған мобильді топ ұңғымалардың жұмыс жасауын тексеріп жүр. Егер барлығы дұрыс болса, қосымша құдық қазылып, оған да су айдағыш қондырылады. Дегенмен, олар мәселеге себеп ауыл тұрғындарының суды кесте бойынша пайдаланбауында дейді. Су сұраған тұрғындар аудан әкімі уәде еткен 3 күнді күтеміз деп отыр. Қаланың бұрынғы әкімі Ілияс Испанов хабардар мәселені жаңа әкім шешіп берсе деген үміттері де бар. Себебі су үшін ай сайын ақыларын төлеп отыр.