Қаңғыбас иттер қоғам назарына түсіп, жаңа шара қолданылмақ

Қазақстанда қаңғыбас иттерге қатысты жаңа заң жобасы қоғамда қызу талқыланып жатыр. Құжатта иесіз жануарларды белгілі бір мерзім ұстағаннан кейін эвтаназиялау қарастырылған. Бірі мұны тұрғындардың қауіпсіздігі үшін қажет десе, енді бірі жануарларды жаппай өлтіруге қарсылық білдіруде. Ал тұрғындар ит пен мысық мәселесін қалай шешуді ұсынады?
Қаңғыбас иттер мәселесі жыл сайын қоғам назарынан түспей келеді. Бір жағынан, тұрғындар балалар мен ересектерге қауіп төнуі мүмкін екенін айтып, көшедегі иттердің санын реттеуді сұрайды. Екінші жағынан, жануарларды өлтіруге қарсылық білдіріп, гуманистік шешім қажет екенін айтатындар бар. Ал мысықтарға қатысты тұрғындардың пікірі біршама өзгеше. Көпшілік оларды аяйтынын айтып, жануарларды арнайы орындарға орналастыруды ұсынады. Қаңғыбас ит пен мысықтың көшеде жүруі - Ақтөбе тұрғындары үшін таңсық емес. Ал жануарларды қорғаушылардың айтуынша, олардың көшеге шығуына көбіне адамның өзі себеп болады. Иелері жануардан бас тартқанда, оны жол бойына, аялдамаға немесе көшеге тастап кететін жағдайлар аз емес. Зооқорғаушылар жаңа заңдағы ұсыныстарды осы тұрғыдан алаңдатарлық деп бағалайды. Себебі жануарларды уақытша ұстауға арналған орындар жеткіліксіз болса, оларды жою мәселенің шешімі болмайды. Зооқорғаушының пікірінше, мәселені жануарларды жоюдан емес, олардың санын көбейтпеуден бастау керек. Ол үшін зарарсыздандыруды халыққа қолжетімді ету қажет. Мәселенің өзектілігін сәуір айында Мәжіліс депутаты Еділ Жаңбыршин де атап өткен болатын. Оның айтуынша, қолданыстағы аулау, зарарсыздандыру, вакцинациялау және қайтадан ортаға жіберу тәсілі қаңғыбас жануарлардың санын азайта алмаған. Ал қаңғыбас жануарлар мәселесінде тұрғындардың талабы ортақ - қауіпсіз орта қажет. Алайда оны қалай қамтамасыз ету керек деген сұрақ әлі де пікірталас тудырып отыр. Бірі бақылау мен аулауды күшейтуді ұсынса, енді бірі арнайы орындар ашып, жануарларды сақтап қалуды көздейді.

Количество показов: 12
Дата создания: 29.08.2026 10:00:51