"Үздік тауар" атағына үміткерлердің бірі - "Шыңғыс" шаруа қожалығының өнімдері: қымыз бен жылқы еті. Қожалық Әйтеке би ауданы, Ақтасты ауылы, Сарқопа жайлауында орын тепкен. Қожалық иесі Орынбай Жолмұратов 10 жылдан бері жылқы бағады. Соңғы жылы 100 тонна қымыз, 50 тонна ет өндірген. Қожалықта бие сауу және қымыз сапыру тұтастай автоматтандырылған. Табиғи таза дайын өнімді қалаға әкеп тапсырады. Қымыз тез бұзылатын сусын болғандықтан, Орынбай Жолмұратов оны ұнтақ түрінде өңдеп сатуды қолға алмақшы. Сөйтіп, өнімді өткізу географиясын кеңейту ойы бар. Қымыздан бөлек, "Ақтөбенің үздік тауары" көрме-байқауына бал, таңқурай тосабы, ұн және макарон өнімдері, ауыз су өндіретін кәсіпорындар қатысты. Көрмеге сондай-ақ, тұрмыстық химия, құрылыс материалдары, кәдесыйлар, арнайы киім түрлері шығарылған. Биылғы байқаудың ерекшелігі - ауыл кәсіпкерлері көбірек тартылды. Комиссия байқауға ұсынылған барлық тауармен танысып, қарап шықты. Жеңімпаздар үш аталым бойынша анықталды. "Өндірістік мақсаттағы үздік тауар" аталымында бірінші орынды "Ақтөбе өртке қарсы жабдық зауыты", екінші орынды арнайы киім тігетін "Глобал" мекемесі, үшінші орынды Ақтөбе рельс-арқалық зауыты алды. "Халыққа арналған үздік тауар" аталымында бөлмеаралық есік жасайтын "Вест лайн дорс" компаниясы - бірінші, "Қаз Қағаз" компаниясы - екінші, "Ақсу" жиһаз фабрикасы - үшінші болды. Ал, "Үздік азық-түлік тауары" аталымында таңқурай өсірумен айналысатын "Болат ЛТД" компаниясы үздік атанды. "Ақтөбе ет кластері" және "Рамазан" серіктестігі сәйкесінше екінші және үшінші орындарды бөлісті. Аймақтық кезеңнің үздіктері "Қазақстанның үздік тауары" республикалық байқауында Ақтөбенің намысын қорғайды. Сондай-ақ, төрт жыл бойы байқау белгісін жарнамалық мақсатта қолдану мүмкіндігіне ие.