Ақтөбеліктер қысқы олимпиадаға қатысушыларды қолдайды! Осындай ұранмен бүгін тұңғыш президент атындағы саябақта акция өтті. Студенттер, мектеп оқушылары жаппай қысқы спорт түрлерімен айналысты. Қысқы олимпиада ойындарына қазақстандықтар спорттың 9 түрінен 57 лицензия жеңіп алған. Ақтөбеден ешкім жоқ. Қарлы аймақта тұрсақ та, қысқы спорт біздің облыста кенжелеп қалды. Спорт ардагері Владимир Коренков Ақтөбе - бір кездері қазақстандық шорт-трекшілердің отаны еді деп еске алады. Былтыр қалада хоккей модулі ашылып, онда мыңға жуық бала шайбалы хоккей, шорт-трек және мәнерлеп сырғанау сабақтарына қатысып жүр. Батыс-2 ауданында үлкен мұз айдыны салынып жатыр. Ақтөбелік екі шаңғышы Қазақстан жастар құрамасына алынған. Бұл балалар болашақта қысқы олимпиадада Ақтөбенің, Қазақстанның намысын қорғайды деген үміт бар.