Кеңес Одағының батыры Әлия Молдағұлова Қобда топырағында өмірге келіп, Псков облысының Новосокольники ауданында қаза тапты. Отыздан астам фашистің көзін жойып, Отаны үшін жанын пида еткен қаһарман қыздың есімі Жеңіс сөзімен, Жеңіс күнімен бірге аталады. Бүгін жерлестері Әлияның өр рухына бас иіп, ерен еңбегіне тағы бір мәрте тәнті болды. Нәзік қолдарын мылтық шүріппесінен ажыратпаған күйі мерт болған ару қыздың рухы өзінің есімі берілген көшені аралап, бәрімізге көк аспаннан бейбітшілік тілеп тұрғандай. Біз Қобда-Нева суларын сүйіп өскен батыр бойжеткенге "Әлия" әнімен үн қаттық. "Әлия" кешені Әлияның ауылына апаратын жолдың бойындағы Әлияның есімі берілген көшеде орналасқан. Бүгін мәңгілік 19 жастағы қаһарман қыздың құшағы гүлге толды. Облыс әкімі бастаған жергілікті билік өкілдері, теміржолшылар, медицина мен білім, коммуналдық мекемелердің өкілдері ескерткіш алдын раушандар мен қызғалдақтарға, жұпаргүлдерге толтырды. Ақтөбеден 40-қа жуық Кеңес Одағының батыры шықты. Әлия Молдаұлованың мемориалдық кешенінен кейін митингке қатысушылар Батырлар Аллеясына гүл қойды. Бұл жерде қаламыздағы 4 мектептің оқушылары батырлардың рухына құрмет көрсетті.