Қымбатшылықтың қос бүйірден қысқаны соншалық биыл ақтөбеліктер арасында ет алатындар азайған. Мұны ет сатушылар да растап отыр. Облыстық статистика департаментінің мәліметінше, қазан айында 19 әлеуметтік маңызы бар азық-түлік бағасы 100,6 пайызға өскен. Базарда сатылып жатқан көкөністің басым көпшілігі жергілікті өнімдер. Саудагер Лиза Қожаева биыл ет алатындар азайды, дейді. Мұны халық табысының азайып, азық-түліктің қымбаттауымен байланыстырады. Алдыңғы айда келісі 1850 теңге болған сиыр еті бүгінде 150 теңгеге өскен. Қой етінің келісі 1400 теңгеден басталса, жылқы етінің келісі 2500 теңге. Өңірде еттің қымбаттауына жанармай мен жем бағасының көтерілуі себеп болды дейді, сатушылар. "Табыс" коммуналдық базарында жергілікті көкөністер сөрелерге қойылған. Бұрын саяжайларда өсірген өнімдер құны өзге өңірлерден жеткізілетіндерге қарағанда арзан болатын. Қазір тек 10-20 теңге айырмашылықты байқайсыз. Мәселен, жергілікті жерден шыққан картоптың келісі 180 теңге болса, Оралдан келген картоптың келісі 190 теңгеден басталады. Биыл тұрақтандыру қоры жұртшылықтың сұранысын толықтай қамти ала ма? Аталған қордың басты мақсаты өнімдердің халыққа қолжетімді болуын қамтамасыз ету. Биыл облыстық бюджеттен тұрақтандыру қорына 87 миллион теңге бөлінді. Мамандардың айтуынша, аймақта азық-түлік бағасын тұрақты ұстау үшін әуелі өнімнің жеткілікті әрі мол қоры болуы тиіс. "Табыс" коммуналдық базарында сәбіз келісіне 180-200 теңгеге саудаланып жатыр. Ал қызылшаның келісі 180 теңге болса, қырыққабаттың келісі 200 теңге.