Ақтөбелік жастар қарияларды қуантты

Қайырымды істің адамға қуаныш сыйлайтыны анық. Бүгін ақтөбелік жастар жалғызбасты қарияларды қуантты. Облыстық жастар ресурстық орталығының ұйымдастыруымен «Ардагерлерді ардақтайық» акциясы өтті. Еріктілер қарттар мен ардагерлердің үйлеріне барып, аулаларын қардан тазалады. Ұйымдастырушылардың айтуынша, қайырымды іс-шара аясында жұмылған жастар саны - 100. 12 мекен-жайға барып, қайырымдылық жасау жоспарларында бар.
Еріктілер қолғабыс қылған жалғызбасты қарияның бірі - Валентина Меркурьева. Әжей осы өңірдің тумасы. Жолдасынан 2000 жылы айырылған, баласы жоқ. Қазіргі таңда 1947 жылы салынған, іргетасы жоқ ескі үйде жалғыз тұрады. Жүрек аурумен ауырады, қозғалысы шектеулі. Күнделікті тұрмыста сыртқа шығу қиын. Осындай сәттерде еріктілердің көмегі ауадай қажет дейді ол. Қария жастардың жанашырлығына ризашылығын білдіріп, еріктілердің қолдауы үлкен демеу екенін айтты. Жалғызбасты қарияның айтуынша, көмекке көбіне ерікті қыздар келіп жүр. Алайда кейбір жағдайларда олардың күші жеткіліксіз. Әсіресе 1 қаңтар күні қалың қардан үйінің ауласы толықтай жабылып, қақпаны ашу мүмкін болмаған. Сол кезде көршілерінің көмегімен ғана тиісті мекемелерге хабар берілген. Жастардың мұндай бастамалары жалғыз басты қарттарға көмек көрсетіп қана қоймай, олардың қоғамда ұмыт қалмағанын сезіндіреді. Ұйымдастырушылардың айтуынша, бұл акция алдағы уақытта да жалғасын табады. Ал тұрғындар үшін ең бастысы - осындай қамқорлық пен қолдаудың тұрақты болуы.

Количество показов: 7
Дата создания: 14.01.2026 00:29:02