Ақтөбелік жас ұшқыштар мектебінің негізін қалаушы Александр Курбанов өмірден өтті. Виктор Пацаев атындағы жас ұшқыштар мектебін 40 жылдан аса басқарған Александр Курбанов Ақтөбе қаласының құрметті азаматы. Өмірінің соңына дейін мыңнан аса жас ұшқыштар, инженерлерді тәрбиелеп шығарған. Бүгін жас ұшқыштар мектебі ауласында аяулы ұстазды түлектері, туыс- таныстары, замандастары ақтық сапарға шығарып салды. Қаралы митингте аталмыш мектептің директоры Болат Қайпанов Александр Курбановтың әр жылдар бойы жас түлектерге авиация саласында таусылмас білім беріп келгенін еске алды. Қарт ұстаз өмірін бір сәтте болса мектебінсіз елестете алмаған. Ғарыш саласына қосқан ерен еңбегі үшін Қазақстан Республикасы мен Ресей Федерациясының жоғары наградаларымен марапатталған. Жас ұшқыштар мектебін 1969 жылы Александр Курбанов аты аңызға айналған Юрий Гагариннің ғарышқа ұшуынан кейін ашқан. Бірден танымалдыққа ие болған мектеп ер балалардың авиация мен ғарышқа деген қызығушылығын арттыра түседі. Тәрбиеленушілер авиация тарихын, тактиканы, авиатехниканы, аэродинамиканы, әуе навигациясын, авиациялық метеорологияны, радиотелеграфтық әліппені, авиациялық психология мен жарғыларды зерттейді. Физикалық, саптық және атыс дайындығын жақсы меңгерген. Мектеп өзінің Виктор Сляктин, Олег Коженков, Василий Удод және басқа да оқытушылар құрамымен танымал. Білім ордасын бүгінге дейін 1400-ден аса түлек аяқтап шыққан. Барлығы авациямен өмірлерін байланыстырмағанмен, олардың ішінде танымал заңгерлер, экономистер, бизнесмендер, дәрігерлер, құрылысшылар бар. Солардың бірі, 1972 жылғы түлек Әлмұрат Дербісалинов.Тәжірибелі заңгер ұстазын аса сағынышпен еске алды.
Қазіргі Әуе қорғаныс күштері Әскери институты курсанттарының арасында ақтөбелік жас ұшқыштар мектебінің 20 түлегі бар, ал 10-ы оқуын жалғастыруда.