Күзгі ауа райы құбылмалы. Десек те қалаға әзір қатқақ түсе қойған жоқ. Соған қарамастан көлік тізгініндегі ақтөбеліктер жазғы дөңгелектерін қысқысына ауыстырып та үлгерген. Зерттеу нәтижелеріне сүйенсек, сынап бағаны бір апта бойы +5+7 градустан көтерілмесе, дөңгелек алмастырудың қамына кірісу керек. Сондай-ақ, қазір автокөлік иелері тауардың бағасына емес, сапасына көбірек көңіл аударады. Қазан айы қалалық көлік иелері үшін қолайлы болып тұр. Түн салқын болғанмен, мұз қата қойған жоқ. Десек те, темір тұлпарларын қысқа ерте әзірлеп, көлік дөңгелегін ауыстырып алғандар бар. Дөңгелек сататын және жөндейтін орталық мамандарының айтуынша, тұрғындардың бірқатары қысқы шиналар сатып алып, дөңгелектерін ауыстырған. Қазір қаладағы дүкендерде жаңа дөңгелек бағасы 9 мың теңгеден бастап, 100 мың теңгеге дейін барады.Қысқы және жазғы дөңгелектердің айырмашылығы "тікендерінде" ғана емес. Химиялық құрамына да байланысты. Сондай-ақ, "жабысқақ" дөңгелектер де кеңінен қолданылады. Мамандардың айтуынша, барлық мерзімге арналған әмбебап дөңгелектер қысы қатты аймақтарға жарамайды. Ал дөңгелектердің жарамдылық мерзімін арттыру үшін әр 8 мың шақырым сайын дөңгелектердің орнын ауыстырып отыру керек. Автоарғымағың сенімді болу үшін жылдың қай мезгілінде де уақытылы тексеріп тұрған артықтық етпейді.