Ақтөбеде мектепте оқитын 206 баланың артық салмағы бар. Бұл сан былтырғыдан көбейген. Дәрігерлер бұны дұрыс тамақтанбаудан көреді. 2-сәуірде елімізде "Дұрыс тамақтану - үздік білім алудың жолы!" атты ұранмен онкүндік жарияланды. Көшеден сатып алатын тез дайындалатын тағамдар, газдалған сусындар, құнарсыз тіскебасар тәттілер оқушылардың денсаулығын құртып жатыр. Мамандар бүгін бас қосып, осы мәселені талқылады. М.Оспанов атындағы Батыс Қазақстан мемлекеттік медициналық университетінің студенттері былтыр балалар арасында ғылыми зерттеу жүргізген. Ақтөбелік жеткіншектердің 12 пайызы семіздікке шалдыққаны анықталды. Ал, 25 пайызының салмағы нормасынан артық. Медицина университетінің магистрі Ұлдай Ахметова бала көп уақытын мектепте өткізгендіктен, мектептегі мұғалімдер, медбикелер оның не жеп жүргенін қадағаласа дейді. Ал, ата-ана баласын қуырылған, ащы, тұзды тамақтардан, фаст-фудтан, газдалған сусыннан шектеуі керек. Мектептегі асхананың жайы мәз емес. Облыстық қоғамдық денсаулық сақтау департаменті мамандары жыл басынан бері Ақтөбедегі 57 мектеп асханасын тексерген. 611 санитарлық нормаларды бұзу дерегі анықталды. Атап айтқанда, оқушыларға қуырылған бәліш сатылған. Бір балаға тиесілі тамақ рационы сақталмаған. Асханадан алынған сорпа сынамаларының 12-нен ішек таяқшалары табылды. Кейбір мектептердің асханасында ыдыс жуу ережесі бұзылған. Қалыбы ашылған азық-түліктің уақыты таңбаланбаған. Санитарлық ережелер мен тамақтандырудың талаптарын бұзған 25 мектептің асханасына 1 миллион 346 мың теңге айыппұл салынды. Басшыларына кемшіліктерді жою жөнінде нұсқамалар берілді.