Бұл әке мен ұлдың сахнаға шықпас бұрын дайындығы. Төлеген Ермеков пен Ернар Алтыновтың дуэтін ақтөбеліктер жақсы біледі. Төлеген Ермеков "Наурыз" тобының әншісі. Ернар да әкесінің жолын қуып, жақсы әнші болуды армандайды. Республикалық байқаулардан тыс қалған емес. Бүгін олар сахнада қазақтың халық әндерін орындады.Өнерде де , өмірде де бірге жүрген жарасымды жұптардың бірі- Айнагүл Өлмесекова мен Шынтас Омаровтар. Екеуі де Т.Ахтанов атындағы облыстық драма театрының әртістері. Талай спектакльдерде ойнап, қайталанбас образдарымен көрерменнің жүрегін жаулаған жұп бүгін сахнаға шығып, ән шырқады. Екеуі студенттік шақтан бірге келеді. Отау құрғандарына 20 жыл. Айнагүл театрда кәсіби актриса болса, үйде-үлгілі келін, жақсы жар,-дейді жұбайы Шынтас. Бүгінгі мерекелік шараның мақсаты-шаңырақтың беріктігі мен отбасылық құндылықтарды баршаға насихаттау. Қала әкімі Ілияс Испанов өнерлі 10 отбасын құттықтап, оларға грамота мен ақшалай сыйлықтар табыстады. Бала тәрбиесімен айналысып, жұмысты қатар алып жүрген әйелдерге алғысын білдірді. Бұл концерт "25 жұлдызды күн" бағдарламасы аясында ұйымдастырылған. Ал өнерлі отбасыларды ұлықтау алдағы уақыттарда да жалғасын табады.