"Дару" оңалту орталығының маңынан "Дару жарығы" офтальмологиялық орталығы салынып жатыр. Мұнда еуропалық аппараттар әкелініп, күрделі ота жасалатын болады. Сонымен қатар, Батыс-2 ауданында облыстық жедел және шұғыл медициналық жәрдем станциясы бой көтереді. Екі емдеу орталығының құрылысымен бүгін облыс әкімі Бердібек Сапарбаев пен Денсаулық сақтау және әлеуметтік даму министрлігінің жауапты хатшысы Аида Құрманғалиева танысты. "Дару жарығы" офтальмологиялық орталығының  құны - 3 миллиард теңге. Бұл орталық 60 кереуетті. Емхана күніне 500 адамды қабылдай алады. Барлығы 150-ден астам адам жұмыс істейтін болады. Сонымен қатар, бұл жерде аллергиялық орталық та салынады. Бұл келер жылдың жұмысы. Медициналық кластер аясында салынып жатқан кешенді емдеу орталықтары үшін жатақхана қажет. Бұл ұсынысты өңір басшысы Бердібек Сапарбаев министрлік өкілі Аида Құрманғалиеваға жеткізді. Мұнан кейін халықаралық форумға қатысушылар мемлекеттік-жеке меншік серіктестік аясында құрылысы жүріп жатқан жедел жәрдем бекетіне  барды. Қазір  су жаңа 14 көлік келіп тұр. Құжаттары рәсімделген соң қаладағы жедел жәрдем бекеттеріне пайдалануға беріледі. Жедел жәрдем бекетін  түрік инвесторлары салып жатыр.