Облысымызға іссапармен келген Қазақстан президенті Қасым-Жомарт Тоқаев бүгін ақтөбелік активпен кездесті. Жиын Аққағаз Досжанова атындағы конференц-холлда өтті. Онда президент елде атқарылып жатқан жұмыстар және жоспарлар жөнінде айтып, облыс басшылығына өңірдің әл-ауқатын түзеуге қатысты бірқатар тапсырма берді. Біріншіден халықты сапалы, әрі қолжетімді баспанамен қамту қажеттігін жеткізді. Осы орайда біздің өңірде биыл 1 миллион шаршы метр тұрғын үй пайдалануға беріледі. 1288 көпбалалы ана пәтермен қамтылады. Қасым-Жомарт Тоқаев елде тұрғын үй мәселесі түпкілікті шешімін табуы қажет деді. Сондықтан елдегі барлық тұрғын үй бағдарламалары біртұтас тұрғын үй құрылысы саясатына біріктіріледі. Осы жерде қандай да бір бастама өңірлерден түсуі керек. Президент тұрғындардың табыс көлемі облыс әкімдерінің жұмыс көрсеткішіне айналады, деді. Ақтөбеліктердің қазіргі орташа табыс мөлшеріне көңілі толмаған мемлекет басшысы мекемелер мен кәсіпорындарға жұмысшыларының жалақысын жыл сайын өсіруді тапсырды. Облыста жолдар үкіметтің қолдауымен жөнделетін болады. Қазір Ақтөбе-Атырау тас жолы салынып жатыр. Облыс орталығынан Қандыағаш, Хромтау қалаларына бағытталған тас жолдар қалыпқа келтірілуі керек. Қандыағаш-Шалқар-Ырғыз жолдарының құрылысын қаржыландыруды жеделдету тапсырылды. Бүгінгі басқосуда президент аймақтың экологиялық ахуалына да тоқталды. Мәселені реттеуді үкімет пен әкімдік бірлесе қолға алады.