Қалаға БҰҰ-ның біздің еліміздегі тұрақты үйлестірушісі Норимаса Шимомура мен Еуропа Одағы Ынтымақтастық бөлімі Қазақстандағы делегациясының басшысы Йоханнес Стенбек келді. Былтыр сәуірде қалаға қызыл су кіріп, бірталай ақтөбелік зардап шегіп, шығынға батты. Топан су кезінде Ақтөбе, Сазды су қоймаларындағы ылғал деңгейі секундына 790 текше метр жылдамдықпен көтерілген. Мыңға жуық адам эвакуацияланды. Осы оқиғадан кейін жергілікті билік облыстағы су-тоғандарда ескерту және мониторинг жүйесін автоматтандыруды жеделдетті. Бұл істе өңірге ЕО және БҰҰ-ның Даму бағдарламасы көмекке келді. Ақтөбе су қоймасында плотина жағдайын бақылап, ылғал деңгейін реттеп отыратын автоматты жүйе 2015-ші жылдан бастап әзірленген. Пилоттық жоба былтыр күзде іске қосылды. Қазір жұмыс жасап тұр. Құрылғының өңірге тигізіп жатқан пайдасын өз көздерімен көру үшін Ақтөбеге ЕО және БҰҰ-ның делегаттары келді. Пилоттық жобаны іске қосуға 7 миллион еуро жұмсалды. Қарғалы су қоймасын автоматты қадағалау жобасы да дайын тұр. Оны жүзеге асыру үшін қазір облыс әкімдігі инвесторлар іздеп жатыр. БҰҰ-ның Даму бағдарламасының Қазақстандағы тұрақты өкілі Норимаса Шимомура Ақтөбе су қоймасына қондырылған ерте алдын алу ескерту жүйесін бүтін ел бойынша енгізу қажет деп есептейді. Қазақстанда 1700 гидротехникалық нысан бар. Оның 70-і ең ірілері. Қазір үкімет 40 гидротехникалық нысанды бақылап, басқаруды автоматтандыруды қолға алған.