Өткен жылы киік қырылған аумаққа биыл ақбөкендер қайта оралмады. Еліміз бойынша небәрі 100 мыңнан астам киік қалған. Өткен жылы 150 мың ақбөкен қырылып, сапартама нәтижесі бойынша басты себеп пастереллез деп ресми мәлімет таратылды. Дегенмен биыл да алдын алу жұмыстары жүйелі түрде жүргізілген жоқ. Нәтижесінде ақбөкендер Ақтөбе мен Қостанай облыстарынан қашып, Ақмола мен Қарағанды облыстарына кетті. Ал ол жақта мемлекеттік резерват жоқ. Аурудан бөлек браконьерлер де айылын жияр емес. Әсіресе, көршілес Қызылорда, Қостанай облыстарынан келіп, 2-3 адам кем дегенде 60 киік мүйізін алып кетеді екен. Бағасы да қымбат. Нарықтағы құны келісіне 100 мың теңге. Осылайша соңғы 8 жылда 318 киікті браконьерлер атып алған. Ал өткен жылы 8 дерек тіркелді. Көбін резерват қызметкерлері анықтайды. Ал облыстық ішкі істер департаменті өз бетімен заңсыз аңшылық құрғандарды ұстаған емес. Еліміз бойынша соңғы екі жылда киіктерді ату дерегі бойынша 139 қылмыстық іс қозғалды. 126 адам сотталғанымен, көбі айыппұл төлеп, жазадан құтылған. Облыс прокурорлары қылмыстық жазаны күшейтіп, азаматтарды бас бостандығынан айыруды енгізуді ұсынып отыр.