Шаһарымыздағы тұрғын үйлердің барлығы жылу маусымына дайын емес. Жылу маусымына дайындық жөніндегі арнайы құжатты мектептер мен балабақшалардан өзге ешқайсысы алмаған. Олардың қатарында Рысқұлов көшесіндегі №16-үйдің 1-ғимараты да бар. Бүгін бұл үйдің жылу жүйесі орналасқан жертөлесін "Трансэнерго" АҚ-ның №3 жүйелік аудан басшысы Серік Сатанов аралап көрді. Шіріген жылу құбырлары жедел ауыстыруды талап етеді.
Төбесінен су кетіп, жарамсыз үйлердің қатарына іліккен Рысқұлов көшесіндегі №16 үйдің 1-ғимараты осыдан үш жыл бұрын терможаңғыртудан өткен. Ол үшін кондоминиум төрайымы Гүлфара Үкібаева көп жүгіріпті. Дегеніне жеткен кондоминиум басшысы жылу маусымына тұрғын үйдің дайындығын растайтын құжат ала алмай отыр. Алдымен жертөледегі ескі құбыр жөнделуі тиіс. Ал, тұрғындардың қалталарынан көк тиын да шығарғылары жоқ.
Жертөледегі жылыту жүйелері су жылу тораптарына араластырғыш құрылғы арқылы тікелей жалғанған. Бұл ережеге сай емес. Шіріген жылу құбыры мен элеваторды ауыстыруға көмекті Гүлфара Үкібаева енді "Трансэнерго" АҚ-нан сұрамақшы. Ал, шығынды тұрғындардың есебінен түбіртек арқылы төлетсе дейді.
Ескі құбырдың орнына шамамен 120 метр жаңа құбыр салынуы тиіс. Кондоминиум төрайымы Гүлфара Үкібаеваның ұсынысы мамандардың айтуынша, арнайы өтініштен кейін ғана қаралады.