Ақтөбедегі кейбір көпқабатты үйлер пәтер иелері кооперативіне миллион теңгелеп қарыз. Мәселен, Абай даңғылындағы №3- үйдің тұрғындары "Дело" пәтер иелері кооперативіне 602 мың теңге бережақ. Бұл бір жылда жиналған қарыз. Пәтер иелері кооперативі төрағасы Григорий Ятель бірақ ешқандай тұрғынның атына сотқа арыз түсірмеген. Тек соңғы айларда «Аqtobe su-energy group» АҚ атына өтініш қағазын жіберген.Абай даңғылындағы №3- үйде шамамен 80 пәтер бар. Ескі үйдің шаруашылық жұмыстарына ұзақ жылдардан бері "Дело" ПИК-і жауапты. ПИК төрағасы Григорий Ятельдің айтуынша, тұрғындардың кооператив атына арыз-шағымы жоқ. Құбырлар жүйесі әрине ескі, бірақ жұмысқа жарап тұр. Жақында салқын су құбырлары жаңартылған. Келер жылға жоспар бойынша кәріз жүйесі толық жөнделуі тиіс. ПИК төрағасының тұрғындарға өкпесі қара қазандай. Кейбір пәтер иелері тіпті жылдап есік ашпайтын көрінеді. 20,30 мың теңгеден қарыз үйлер бар. Келер жылдан бастап көпқабатты үй жекешелендірілген ортақ меншік бірлестігіне өтпекші. Ол үшін кооператив төрағасы Григорий Ятель барлық құжаттарды дайындап қойған. Соңғы жиында барлық тұрғындар түгел қатыспағанмен кейбірі үйдің шаруашылық жұмыстарын басқаруды бірлестік құрамына өткізу туралы шешімді қолдаған.