Елдің дәріханалары келер жылдан бастап GPP дәріханалар тәжірибесі халықаралық стандартына көшуге әзір емес. Облысымыздың өзінде 300-ден астам дәріхана болса, соның біреуі ғана талапқа сай. Бұл жөнінде фармация комитеті облыстық департаментінің басшысы Ринат Құбатаев жеткізді. Қалғандарында жоғары білікті маман-қызметкерлерді оқытып, дайындау қажет. Ешқашан ұмытылмайтын, жойылмайтын талаптар рецептсіз дәрі шығармау, дәріханаларда тауарларды сақтау заңдылығын қатаң бақылау. Алайда бұл талаптардың өзі бізде жиі бұзылады. Бірақ, қарапайым халық дәрі-дәрмекті еркін тұтынудың аса қауіпті екенін қаперлеріне алмайтын сыңайлы. Дәрігерлер көмегіне жүгінбей, өз-өзін емдеуді әдетке айналдырған тұрғындарға дәріханаларда қолжетімді бағаға дәрілер рецептсіз сатыла берсе болғаны. Ал біз біле бермейміз, негізінен дәріханада фармацевтпен жеке кеңесуге арналған оқшауланған бұрыш болуы қажет. Дәріханаға келіп тұрған адам барлығының көзінше дәрі-дәрмек немесе өзге бұйымдар сатып алудан қысылады. Не сатып алып жатқанын бөгде біреулердің білгенін, көргенін қаламайды. Оқшау бұрыш осындай жағдай үшін қажет. Сонымен қатар әр дәріханада салауатты өмір салтын қалыптастыру бұрышы жабдықталуы шарт. Тіпті әр дәріханада бір-бір дәрігер-маманның қызмет еткені артықтық етпейді. Өзге стандарттарға келсек, тиісті зертханалық практика стандартымен елде дәрі-дәрмектерді сараптау ұлттық орталығы жұмыс жасайды. Ал клиникалық практика стандартын біздің облыстың өзінде кез-келген аурухана енгізе алады. Клиникалық стандарт медициналық препарат, құрал-саймандарды сынақтан өткізу. Тиісті деңгейде жабдықталған клиникалық ауруханалар бұл стандартты енгізу арқылы бәсекеге қабілетілікті арттырады. Бюджетін де өсіре алады.