Ақтөбедегі лаңкестік оқиғалар жергілікті күштік құрылымдардың мұндай жағдайға дайын еместігін көрсетті. Облыстық ұлттық қауіпсіздік және ішкі істер департаменттерінің басшылары мұны Премьер-министр Кәрім Мәсімовтың алдында мойындады. Лаңкестікпен күрес бойынша өңірлік жедел штабтың жұмысы №6655 әскери бөлімінде өткен отырыста қорытындыланды. Лаңкестікпен күрес бойынша өңірлік жедел штабтың жұмысы туралы үкімет басшысының алдында алдымен ұлттық қауіпсіздік комитетінің Ақтөбедегі департамент басшысы Нұрлан Қыдырбаев есеп берді. Оның айтуынша, облыста салафизмді ұстанатындар қатары жаңа адамдармен толығып жатыр. Қазірдің өзінде мың жарымнан асқан. Соның жүз шақтысы ықтимал жиһадшы. Оларды үнемі бақылауда ұстау үшін уақыт, күш және құрал керек. Өткен жылдан бері ұлттық қауіпсіздік комитеті қызметкерлері теріс ағымдарда адасып жүрген 32 адамды кері қайтарған. Көбі айтқанға көнбейді. Салафизмге аса беріле қоймаған азаматтарды түзу жолға түсіргенмен, оларды үнемі бақылауда ұстап отыру керек, дейді Нұрлан Қыдырбаев. Өйткені, адасқан жандарды ғаламтор арқылы арбайтындар аз емес. Кешегі радикалды топ басып алуды жоспарлаған нысандар қатарында түрмелер, мемлекеттік мекемелер және ұлттық қауіпсіздік депаратментінің ғимараты да бар. Облыстың бас чекисті 1968-жылы салынған нысан қауіпсіздік талаптарына сай келмейді дей тұра, қызметтің барлық проблемаларын тізіп берді. Полиция қызметінің де мәселесі осыған ұқсас. Кадр мен техника жетіспейді. Мамандар дайын емес. Ақтөбедегі жағдай тұрақтанды. Кәрім Мәсімов енді халықтың әлеуметтік мәселелеріне көңіл бөлуді тапсырды.