Ақтөбеден Қостанай облысына Азия шегірткесі үйірімен ұшып жетті. Бұған дейін Батыс Қазақстан облысына да өңірімізден шегіртке қаптаған. Осындай ақпараттар соңғы кезде әлеуметтік желіде өріп кетті. Агроөнеркәсіптік кешендегі мемлекеттік инспекция комитетінің облыстық аумақтық инспекциясы мамандары бұл ақпараттардың жалған екенін айтады. Себебі әлеуметтік желіге шыққан бейнематериалдардың растығын анықтау үшін Орал мен Ақтөбенің арасындағы шекара тексерілген. Жуырда Әйтеке би, Ырғыз аудандары мен Қостанайдың Қамысты және Жангелдин аудандарының шектескен шекаралары да тексерілген. Ақпарат расталмады. Аумақтық инспекциядағылардың сөздерінше, бейнежазба 3-4 жыл бұрын болған жағдайларға ұқсайды. Себебі өңірде шегірткенің Азия түрі соңғы рет 2015 жылы Ырғыз, Әйтеке би аудандарында ғана анықталған. Одан кейін шегірткенің болмауына байланысты химиялық өңдеу жүргізілмеген. Ал, Италия шегірткесі биыл былтырғымен салыстырғанда 70 пайызға азайған. Шегірткенің бұл түріне қарсы химиялық өңдеу жұмыстары аймақта 30-мамырда басталып, 3-шілдеде аяқталды. Облыста биыл жоспар бойынша 56 мың гектардан астам жер шегірткеге қарсы химиялық өңделуі керек. Алайда, оның 49 мың гектарға жуығы ғана өңделген. Аймақта химиялық өңдеу жұмыстарын биыл "Ақтөбе-Құнарлылық" ЖШС-і жүргізген. 5 аэрозолдық генератор, 1 ультрашағын көлемді бүріккіш пайдаланылған. Республикалық бюджеттен 53 млн. теңгеге "Имидор", "Комбат", "Даклоприд" секілді 5500 литрге жуық улы химикат бөлінген.