Теңгенің құлдырауына АҚШ-тың Ресей, Түркия және Қытайға қарсы салған санкциясы себеп. Кеше Ұлттық банк осылай деп хабарлаған болатын. Алайда, бүгін Ұлттық экономика министрі Тимур Сүлейменов АҚШ-тың Қазақстанның мүддесін есепке алу туралы кепілдеме бергенін мәлім етті. Жыл басынан бері теңгенің АҚШ долларына қатысты бағамы 1 доллар үшін 318 теңге 31тиыннан 347 теңге 6 тиын аралығында өзгерді. Тамыз айы басталғалы теңге 4,8 пайызға, жыл басынан бері 9,3 пайызға әлсіреді. Бүгін үкімет отырысында Ұлттық банк төрағасының орынбасары Олег Смоляков ішкі валюта нарығындағы жағдайға қатысты осылай деп мәлімдеді. Қазір аймақтағы валюта нарығында жағдай қалыпты. Банктер мен ақша айырбастау пункттерінде қарбалас жоқ. Теңге де, шетелдік валюталар да жеткілікті. Қазір шаһардағы айырбастау нүктелерінде 1 доллар 365 теңге 5 тиын тұрады. 1 АҚШ долларын сатып алу құны 363 теңге 5 тиын. Ақтөбеліктердің дені саяси шиеленістен хабарсыз болып шықты. Дегенмен, теңгенің құнсыздануына алаңдаулы. Тұтынатын дүниелер қымбаттап кете ме деп қорқады. Ал, Ұлттық экономика министрі Тимур Сүлейменов теңгенің құнсыздануының бюджеттік бағдарламалардың орындалуына кері әсері бар, жоғы сараланып жатқанын айтты. Министр теңгенің қазіргі құлдырауын девальвация деп атай қойған жоқ. Ал Ұлттық банк төрағасының орынбасары Олег Смоляковтың мәлімдеуінше Ұлттық банк теңгенің долларға қатысты бағамының ауытқуын деңгейлестіру үшін, қажет болса интервенция жасауға дайын. Бүгін Қазақстан қор биржасындағы таңғы және күндізгі сессия барысында теңгенің долларға шаққандағы орташа бағамы 363 теңге 28 теңге болды.