Өткен тәулікте 29 ақтөбеліктен коронавирус жұқпасы анықталды. Індетті жұқтырған барлық науқас облыстық жұқпалы аурулар ауруханасында оқшауланды. Облыстың бас дәрігері Әсет Қалиевтің мәлімдеуінше, вирус жұқтырғандардың барлығы бұған дейін карантинге оқшауланғандар. Көшеден не шағын дүкендерден індет жұқтыру деректері тіркелген жоқ. Қазір өңірде коронавирус жұқтырғандар саны 213-ке жетті. Оның 15-і кәмелет жасына толмаған бала. Екеуі бір жасқа да келмеген нәресте. Он бір бала дертінен сауығып үйіне жіберілсе, төртеуі әлі ем қабылдап жатыр. Тағы 147 ақтөбелік вирусқа қарсы кешенді ем-домды сауықтыру госпиталдерінде алуда. 62-і ақтөбелік атынан адам шошитын коронавирус инфекциясын жеңіп шыққан. Облыстың бас дәрігері Әсет Қалиев науқастармен қарым-қатынаста болған қызметкерлердің бұл індетті жұқтырып алу деректері көбейгеніне алаңдаушылық білдірді. Медицина қызметкерлері және әскерилерден бөлек коронавирустың құрығына вахталық әдіспен нәпақасын тауып жүрген жұмысшылар іліккен. Атырау облысындағы "Теңіз Шевройл" компаниясының жұмысшыларымен тығыз араласқан жандардан да алынған қан сараптамасы оң нәтиже көрсеткен. Барлық жаңадан тіркелген науқастармен байланыста болған 695 адам карантиндік стационарға алынды. Жедел жасалған тест нәтижелері теріс нәтиже көрсеткен. Қаулыға сәйкес, қарым-қатынаста болған тұлғалар 14 күн карантинде болып, бірнеше рет сынама алынады. Ақтөбеде карантиндік шектеулер 17-ші мамыр күні тағы да азаяды. Төртінші кезеңде балабақшалар, қоғамдық тамақтану орындары, ірі сауда үйлері мен базарлар ашылуы мүмкін.