Кірпішті ауылына жұманың түні ауа су жетті. Таң атқанша бір метрге дейін көтерілді. Баспаналарының табалдырығына кілкілдеп келген тілсіз жау одан әрі жертөлелерге лық еткен кезде халық құтқарушыларды іздей бастаған. Қызыл су басы-көзіне қараған жоқ. Коттедждерге де сарылдай ақты. Құтқарушылар бірінші болып қайықтармен әйелдер мен балаларды, қарияларды тасыды. Судан қашқандар қақпалардың төбесіне шығып кеткен. Адамдарды тасу таң атқасын да, түсте де, кешке де тоқтаған жоқ. №2 құтқару бекетінен он үйге бір резеңке қайық берілген. Бұл аздық етті. Құтқарушылар тұрғындарды арқалап шығаруға кірісті. Адамдар құтқарушылардың жалғыз қайығына мойын созып отыра бермей, өз беттерінше әрекет етуге кіріскен. Қайықтар тауып, судың ортасынан шығып жатты. Ақтөбеде сенбі күні түнде жергілікті деңгейдегі төтенше жағдай енгізілді. Бүгін күшіне енді. Бұл туралы бүгін өткен шұғыл жиында қала әкімі Ільяс Испанов мәлімдеді. Жағдай мәз емес. Су әлі келіп жатыр. Су шаруашылығы мекемесінің басшысы мәлім еткендей бүгін Ақтөбе су қоймасына 200 млн текше метр су келіп, ылғал көлемі 790 млн текше метрге жеткен. Бұны ешкім күтпеген. Артық су өзенге тасталды. Басқа жол жоқ. Ешқандай болжам да жоқ. Хромтау жақтағы далалықтан су әлі құйылып жатыр. Бәрі бір Алланың қолында. Шенеуніктердің бәрі күн райына тәуелді. Бірақ, қол қусырып отырмау керек деген шешім шығарылып, төтенше жағдай жарияланды. Ақтөбе мен Сазды су қоймалары 100 пайызға толса, Қарғалы су қоймасында 66 пайыздық деңгей. Егер ол толса, жағдай одан әрі ушығуы мүмкін. Сазды су қоймасы автоматтандырылған. Сол себепті артық суды өзі бірден өзенге төгеді. Билік жетпеген арнайы техникаларды жеке кәсіпкерлерден сұрап алып жатыр. 100 су сору көлігі шыққан. Әсіресе жүк көліктері қажет. Құм-тас апарып, кері қарай жұрттың мүліктерін алып қайту үшін. Саяжайларда 5 үй қирап қалған. Әсіресе Елек пен Сазды тоғысқан жерлерде ахуал күрделі. 734 адам эвакуацияланды. 500-ден астам адам үйлерінен кетпеген, бірақ, кейін мәжбүрлі түрде жағаға шығарыла бастады. Адамдар мектептердегі бекеттерге жеткізіліп жатыр. Су күндіз қайтып, түнде көтеріліп тұр. Учаскелерге бақылау бекеттері қойылды. Қауіпсіздікті сақтау үшін тәртіп сақшылары кезекшілікте. Алайда ұры-қарылар ештеңеге қарамастан бос қалған үйлерді үптеп жатыр. Әсіресе Қисық көл атты аумақта ұры жаудай дейді тұрғындар. 95 тұрғын №40 орта мектепке жеткізілген түнде. Ішер ас, жатар орын берген. Мектепті уақытша паналап отырғандар су кеткесін қайда барарын білмей дал. Ұрылардан не қалып, не қоярын тағы білмейді. Бір түнде баспанасыз қалғандар да бар. Қазір бөгеттер нығайтылып, уақытша суға қарсы қалқандар тұрғызылып жатыр. Електің бойындағы саяжайлар ең қауіпті өңірлер. Қалалық су тасқынына қарсы штабтың телефон нөмірлері - 24-18-43, 24-18-48. 112 қызметі бүгін Қарғалы өзенінде су таситынын ескертіп, смс-хабарлама таратты. Тұрғындарға сақ болған абзал. Қала әкімі Ільяс Испановтың мәлімдеуінше қаланың орталығына төніп тұрған қауіп жоқ.