Ақтөбеде қоғамдық көліктерде өзгенің мүлкіне қол салу деректері көбейген. Статистикалық мәліметтерге жүгінсек, қалада ұрлықтың 65 пайызы автобустарда жасалған. Бұл туралы бүгін облыстық мәслихаттың кеңейтілген отырысында айтылды. Жиында облыстық жергілікті полиция қызметінің бастығы Қаныбек Жақсығалиевтің есебі тыңдалды. Қоғамдық көліктерде ұрлық азаймай отыр. Автобуста жолаушылардың әмиянын, құжаттары мен пластикалық карталары, ұялы телефондарын ұрлау деректері көп. Оның жартысынан көбі ашылмайды. Қалтаға түсушілердің санын азайту мақсатында, көлік салонына бейнетіркеу қондырғыларын орнату мәселесі қаралып жатыр. Көлік иелерін тақырға отырғызып кететіндер көбейген. Бұған жүргізушілердің өздері кінәлі,-дейді полицейлер. Өйткені, көбіне дабыл қағу жүйесі жоқ көліктер тоналады. Қалада тіркелген автокөліктің 11 мыңы ғана арнайы тұраққа қойылып жүр. 7000 жүргізушінің гаражы бар. Қалғандары темір тұлпарын кез-келген жерге тастап жүре береді. Жазасын өтеу орындарынан бостандыққа шыққандардың үштен бірі қайта қылмыс жасайды. Полицейлердің айтуынша, бұған жұмыссыз жүруі себеп. Мәселен, былтыр өңірімізде 2000-нан астам қылмысты бұрын сотталған азаматтар жасаған. Былтыр қоғамдық жерлерде мас болып отырған 11 165 адам уақытша бейімдеу және тедоксикация орталығына жеткізілген. Мәжбүрлі түрде алкагольді ішімдіктен емдеу мекемесіне 300-ге жуық облыс тұрғыны жіберілді. Өйткені, адамды жаралау немесе кісі өлтіру қылмыстарының денін мас адамдар жасаған.