Шаһарда ауыр қылмыстар саны былтырмен салыстырғанда 187-ге азайған. Бұл туралы бүгін қалалық мәслихатта қалалық полиция басқармасының бастығы Бағлан Құрманалин мәлімдеді. Түрлі құқық бұзушылық бойынша 65 мыңға жуық азамат әкімшілік жауапкершілікке тартылған. Қалалық мәслихаттың сессиясында депутаттар алдында бүгін қалалық полиция басқармасының басшысы Бағлан Құрманалин есеп берді. Шаһарда былтыр 12 мыңға жуық құқық бұзушылық тіркелген. 2017 жылмен салыстырғанда 19 пайызға көп. Ал, 2018 жылы тіркелген ауыр қылмыстар саны алдыңғы жылға қарағанда 187-ге азайған. Түрлі құқық бұзушылық бойынша 65 мыңға жуық азамат әкімшілік жауапкершілікке тартылған. Дені - қоғамдық жерлерде ішімдік ішіп, мас болған. Бағлан Құрманалин саны азайған қылмыс түрлерін пайыздық көрсеткішпен тізіп берді. Қазір тәртіп сақшыларын ұрлық алаңдатып отыр. Ұрлықтың барлық түрінен тіркелген деректер көп. 2017 жылы 357-і қалта ұрлығы тіркелсе, былтыр мұндай ұрлық саны 1500-ден асқан. Полиция қызметкерлері жүргізген сараптама қорытындысы бойынша қалта ұрлығы қоғамдық көліктерде жиі болады. Ұрылардың 90 пайызы есірткіге тәуелді тұлғалар. Сессияда қала әкімінің орынбасары Күлпаршын Айдарханова да жастармен атқарылған шаралар туралы баяндады. Соңғы үш айда облыс орталығында 100 жас жұмысқа орналасқан. 5 жұмыссыздар жәрмеңкесі өтіпті. Дегенмен, жұмыссыз жастар саны 1 мыңға жуық. Жастарды жатақханамен қамту мәселесі де көтерілді. Жоғары оқу орындарының 4 мыңнан астам студентке арналған жатақханалары бар. Ал, колледждер жанында 27 жатақхана жұмыс жасайды. Қазір облыс орталығында 3 типтік жатақхана құрылысына құжаттар даярланып жатыр. Ол үшін облыстық бюджеттен 18 млн. теңге қарастырылған.