Прокурорлар мен полиция қызметкерлерінің санын арттыру қажет. Құқық қорғаушылардың материалдық-техникалық базасын күшейтіп, жаңартқан жөн. Сонымен қатар, жеке баспана құрылысына қажетті жер телімін беру үшін инфрақұрылымды дамытып, азық-түлік қауіпсіздігін қамтамасыз ету жолында суармалы жер көлемін ұлғайту керек. Облыс әкімі Бердібек Сапарбаев үкімет басшысы Кәрім Мәсімовке осы ұсыныстарын жеткізді. Облыс активі мен қоғамдық ұйым өкілдері қатысқан жиында үкімет басшысы алдымен лаңкестердің қолынан қаза тапқан отбасылардың туған-туыстарына көңіл айтты. Бәрі жақсы дегенмен, өзекті мәселелер де бар. Қазір облыстық Ішкі істер департаментінің қызметкерлерін көлікпен қамтамасыз ету көрсеткіші 43 пайызды құрап отыр. Бұл республика бойынша төмен көрсеткіштердің бірі. Ал Ақтөбе қаласының халқы күн санап артып келеді. Қазір облыс орталығында 480 мыңнан астам адам тұрса, прокурорлар саны небәрі 47 екен. Кездесу кезінде облыс әкімі Ақтөбе жолдарының 43 пайызы мүлде жарамсыз күйде екенін айтты. Ұлттық экономика министрі Қуандық Бишімбаевтың айтуынша, биыл республикалық трансферттен өңірге 64,6 миллиард теңге бөлініп отыр. "Нұрлы жол" бағдарламасы аясында Ақтөбе-Атырау-Астрахань тас жолын салу жобасы іске асырылады. Жобаны "Азия даму банкі" мен "Ислам даму банкі" қолдап отыр. Ал Орталық-Батыс жобасы аясында қаржы институттары биыл 2 миллиард теңге бөледі. Қазір жобалық-сметалық құжаты әзірленіп жатыр. Айта кетейік, "Бизнестің жол картасы-2020" бағдарламасы аясында биыл өңірге 4,1 миллиард теңге бөлінеді. Бұл субсидия мен инфрақұрылым тарту жұмыстарына бағытталатын қаржы.