Ақтөбеде бүгін қазақ тазысының көрмесі өтті. Оған өңірдегі 50-ге жуық құмай тазы қатысты. Орынбордан келген аңшы Әлімжан Айтуғанов тазылардың дене бітімін, аяқ сүйектерін, тісін, тырнағын байқап, қан тазалығына назар аударды. Көрмеге 3 бірдей тазысын әкелген Ғабит Сейітжанов - кәсіби ит асыраушы. Үйінде тағы 4 тазысы бар. Қасқыр мен қабан алып жүрген тазыларына Ғабит ерекше күтіммен қарайды. Таза етпен тамақтандырады. Әкесінің бұл кәсібіне балалары да көмектеседі. Ғабиттің ендігі арманы - тазыны патенттеу. Қазақы тазы - қазақтың бренді. Егер оны әлемдік кинологиялық орталыққа тіркетіп, қазақтың тазысы екенін дәлелдемесек, ертеңгі күні өзгелер иемденіп кетеді. Тазыны патенттеудің де өз ережесі бар. Оның саны мыңға жетуі керек. Сол кезде барып әлемдік сарапшыларды шақыртып дәлелдеп, тіркету керек. Бірақ, тиісті орталықтар осы істі жүйелі түрде қолға алмай отыр, - дейді ит жанашыры. Қалада алғаш ұйымдастырылған көрмеде тазылар жас ерекшелігіне қарай 2 топқа бөлінді. Шашақ және жарғақ тазылар. Қазылар қазақы тазыларды шеңбердің, түзу сызықтың бойымен жүгіртіп көрді. Тісін, тырнағы, құйрығы мен бастарының формасын сипаттап, суретке түсірді. Тазы жанашырлары иттердің күші көп, жалпы ахуалы жақсы деген баға берді. Таңдап алынған 15 тазы ертең Ақшат ауылында өтетін дала сынағында аң аулайды. Тізімге бұған дейін борсық, қарсақ, қабан, елік, қоян, қасқыр алып жүрген иттер кіргізілді. Жұртшылыққа кеңінен таныс Алау, Тайфун, Титул, Бейім, Жойқын есімді тазылар бүгін де көрмеге келушілерді сүйсіндірді. Көрмені ұйымдастырушылардың мәлімдеуінше, Ақтөбенің қаны таза 20 иті Қазақстан кинологтар одағының тіркеуіне алынған. Болашақта ит жанашырлары тазы санын көбейтіп, тұқымын асылдандыруды көздеп отыр.