Аймақта мал басының өсімі 100 пайыздан артық. Ірі қараны да, ұсақ жандықты та ақтөбелік шаруалар "Сыбаға" бағдарламасы арқылы көбейтіп жатыр. Несиеге алыс-жақын шетелдерден сиыр әкеле бастаған. Биыл аймақтағы мал шаруашылығын дамытуға 5,7 млрд теңге қарастырылған. Бүгінге дейін 4 жарым млрд. теңгесі игеріліпті. Қалған қаржы алдағы айларда игеріледі. Облыста мал басының өсімі жыл санап артып келеді. Жыл басынан бері 7600 бас сиыр өзге елдерден жеткізілді. "Сыбаға" бағдарламасы арқылы соңғы жарты жылдықта 12 мың бастан астам мал алуға несие берілген. Дегенмен, бағдарламаны одан әрі дамытып, кәсіпкерлерді қолдау үшін әкімдіктегілер тағы 6 млрд. теңгеге жуық қаржы сұраған. Бұған дейін шаруалар сатып алған ірі қара малдарын Ресейден жеткізе алмай шу шыққан еді. Облыстық ауыл шаруашылығы басқармасының бөлім басшысы Панабек Бимұратовтың сөзінше, мәселе шешілген. Ұсақ жандық та аймақта жақсы өсіп келеді. Сыбаға мемлекеттік бағдарламасымен 30 мың бас қой сатып алуға несие қарастырылған. Бүгінге дейін 17 мың бас қой алуға несие беріліпті.