Мұнай ұрлығының жолын кесу үшін кешенді жұмыстар жүргізілуі керек. Алғашқы қадам кен орындарында инновациялық технологияларды пайдаланып, бақылауды күшейту. Мұнайды есепке алу тәсілін автоматтандыру керек. Ал көптеген компаниялар әлі ескі әдісті қолдануда. Мәселен, 2014-2016 жылдары "СНПС-Ақтөбемұнайгаз" АҚ- ның "Кеңкияқ" кен орнында ұйымдасқан қылмыстық топ құбырдан тікелей 8 мың тонна мұнай құйып алған. Биыл Ауғанстанға жол тартқан 6 вагон қара алтын анықталды. Осы дерек бойынша 8 адамға қатысты қылмыстық іс қозғалды. Қазір облыстық ішкі істер департаментінде мұнай ұрлығына қатысты барлығы 17 іс тергеліп жатыр. Бүгін мамандар мұнай ұрлығының бірнеше себебін атап өтті. Олар- мұнай зауыттарында заманауи құрылғылардың жоқтығы, дұрыс бақыланбауы, ұңғымалардың тиісті түрде күзетілмеуі, мұнай өнімдерінің құрамын жалған жазып, өзге өнім ретінде тасымалдануы. Андрей Лукин Энергетика министрлігінің ақпараттық жүйесін жетілдіру қажеттігін айтты. Сондай-ақ, мұнай мен газ ұрлығына лауазымды тұлғалардың да қатысы барын жоққа шығармады. Айта кетейік, Ақтөбе экономикасының 15 пайызы мұнай-газ саласына тиесілі. Бұл өндірісте 15 мыңнан астам адам жұмыс істейді. Форум барысында мұнай ұрлығының жолын кесуге бағытталған кешенді жұмыстар жоспарланды.