Ақтөбеде коммуналдық қызметтің 8 түрі арзандады. Қазақстан ұлттық экономика вице-министрі Серік Жұманғариннің сөзінше, біздің өңірде жылу биыл жалпы 19 пайызға арзандайды. Қазір шаршы метріне 129 теңге 25 тиыннан 116 теңге 33 тиынға түсті. "Ақтөбе жылу электр орталығы" АҚ қызметіне компенсациялық тариф бекітілуіне орай, 1-ші ақпаннан бастап жылудың құны бір шаршы метрі үшін 116 теңге 33 тиыннан 104 теңге 7 тиынға дейін арзандайды. Одан бөлек тауарлық газды сату бағасы халық үшін мың текше метріне 9785 теңге 14 тиыннан 8785 теңге 76 тиынға арзандады. Электр қуаты кВ/сағатына 9 теңге 24 тиыннан 8 теңге 33 тиынға түсті. ПИК қызметтеріне шаршы метріне бұрын 20 теңге 5 тиын болса, қазір 19 теңге. Лифт қызметі айына 500-700 теңгеден 450-650 теңгеге дейін арзандатылды. Домофондарға қызмет көрсету айына 300 теңгенің орнына 285 теңге болып өзгерді. Қатты тұрмыстық қалдық шығару қызметі біздің өңірде республика бойынша ең арзаны. Бірақ, сонда да халық үшін тағы бір теңгеге арзандатылып, жан басына шаққанда айына 105 теңгеден 104 теңгеге түсірілді. Бұған дейін жөн-жосықсыз шарықтаған тарифтердің өсімақысы халыққа қайтарылып жатыр. Оны мойындамай жатқан "Энергожүйе" секілді мекемелердің мәселесі сотта шешіледі. "Ақтөбеэнергоснаб" кәсіпорыны 500 миллион теге өсімпұлды тарифке салған. Яғни бұл мекеме қызмет ақысын 12 мен 15 теңге аралығында арзандатуы керек болған. Халық үшін 14 теңге деп тариф бекітті.