Өңірімізде көкөніс қымбат. Әсіресе, күнделікті тұтынатын картоп құны шарықтап кетті. Орталық базарда көкөністің бір келісінің бағасы 150 теңгеге дейін. Жергілікті өнімдер жоқтың қасы. Базар сөресінде тұрғандардың дені Қостанай, Солтүстік Қазақстан облыстарынан жеткізілген. Ресейден әкелінген өнім 130 теңгеге саудаланып жатыр. Жергілікті ұсақ картоптың келісі 100 теңге. Одан төмені жоқ. Сатушылардың айтуынша, жергілікті қордан ақтөбелік өнімдер берілмей жатыр. Қостанайдан келген картоптарды қапшықтап алатындарға саудагерлер көтерме бағамен 110-120 теңгеге береді. Облыстық кәсіпкерлік басқармасының бөлім басшысы Мая Бименованың айтуынша, өңірде картоптың көтерме бағасы 95-100 теңге. Екіжақты келісім бойынша шаһардағы ірі супермаркет желісінің бірі 10 пайыздан артық үстеме қоспай отыр. Ақтөбеде биыл 6,1 мың гектар жерге картоп егілген. 95 мың тонна өнім шығуы тиіс. Бүгінге дейін 93 мың тонна өнім жиналды. Ақтөбе қаласы, Алға, Қарғалы аудандарында егілген картоп қорын мамандар жеткілікті дейді. Облыстық тұрақтандыру қорында биыл 1480 тонна картоп, 200 тонна сәбіз бен 100 тонна қырыққабат сақталады. Тағы 200 тонна жуа әкелу жоспарланған. Тұрақтандыру қорын толтыруға "Жан" шаруа қожалығы және "Пригородный" ЖШС-імен келісім жасалған. Облыстық тұрақтандыру қорының әлеуметтік дүкендерінде картоптың көтерме бағасы 60-100 теңге. Сатылып жатыр.