Ақтөбеде «Кітап әлемі» Book Tourism атты мерекелік шара өтті
Кітап күні биыл елімізде алғаш рет атап өтілді. Өңіріміз де кенде қалмады. Бүгін Абай даңғылындағы Абай ескерткіші алаңы кітап көрмесіне айналды. Ақтөбеліктердің назарына мыңдаған кітап ұсынылған. «Кітап әлемі» Book Tourism атты мерекелік шарасында көрмеге сан алуан жанрда жазылған түрлі тақырыптағы кітаптар қойылды. Т.Ахтанов атындағы облыстық театрының әртістері Мұқағали Мақатаев, Фариза Оңғарсынова, Қадыр Мырза Әли мен Қуандық Шаңғытбаевтың бейнелерін сомдап, өлеңдерін оқиды.Мерекелік шараға облыстық кітапханалар, қала мектептерінің кітапханалары қатысты. Кітапханашылар ақтөбеліктерді қызықтырған кітаптарды ерінбей жеке-жеке түсіндіріп берді. Әр білім мекемесі өздерін кітап тілінде таныстыруға тырысты. Гүлзарда өткен көрмеден өзге Т.Ахтанов атындағы облыстық театр, облыстық Алақай қуыршақ театры әртістері, студенттер әдеби мюзиклдар ұсынды. Қазақ әдебиетіндегі сыршыл ақындардың жырлар оқылды. Әндер шырқалды. Балалар және жасөспірімдер шығармашылық орталығының оқушылары «Кітаппен дос боламыз» флешмобын орындады. Шара қатысушыларының арасында оқушы көп. Дені - кітаппен дос. Кітапты екі нұсқада, яғни қолында ұстап та, аудио түрінде де оқуды ұнатады екен.Ұлттық кітап күні былтыр Атырауда өткен Ұлттық құрылтайда Мемлекет басшысы Қасым-Жомарт Тоқаевтың бастамасымен енгізілді. Бұл күн халықаралық деңгейде де маңызға ие. 1995 жылы ЮНЕСКО 23-сәуірді Дүниежүзілік кітап және авторлық құқық күні деп жариялаған. Алда өңірімізде жаз бойы әр аптаның сенбі күндері ашық алаңдарда, яғни «Абай» гүлзары, «Әдебиет» аллеясы, «Триатлон» саябағы, «Зеңбірек» ескерткіші алаңы және Астана саябағында кітап оқу күндері ұйымдастырылмақ.
Количество показов: 26
Дата создания: 24.04.2025 06:07:58
