Бүгін "Көктем-2018" республикалық командалық-штабтық оқу-жаттығулары өтті. Қалада таңғы сағат сегізде дабыл белгісі беріліп, облысқа электросирена тарады. Төтенше жағдайлар комиссиясы шұғыл жиналды. Алдымен Қарғалы, Ақтөбе, Сазды су қоймаларындағы плотиналар тексерілді. Былтыр көктемде қаланы су алғанда бәрінен қатты зардап шеккен "ЭКО" бау-бақша ұжымы. Сондықтан да бүгін облыстық ТЖД оқу-жаттығуды осы Кірпішті ауданындағы көпір астында жүргізді. Қарғалы өзені арнасынан асып, саяжай үйлеріне қатер төнеді. Оқиға орнына дереу жеткен құтқарушылар мал-жанды қауіпсіз жерге эвакуациялап үлгерді. Қарғалы өзенінің сағасы тазартылды. Одан кейін Кірпішті ауданындағы көпір астында Елек өзенінің сағасы тазартылды. Оқу-жаттығу кезінде сондай-ақ, саяжай тұрғындарына ескерту жасау да ұмыт қалмады. Қызыл судың зардабын бастарынан өткеріп көрген бұл маңның халқы қауіп төнсе, өздігінен қандай алғашқы шаралар қолдану қажеттігін енді біледі. Облыстық ТЖД бастығының орынбасары Қайрат Қасымның сөзінше, қазір жерде 1 метрге дейін тоң бар. Далалықтағы қар еріген уақытта жерге бірден сіңіп үлгермейді. Сондықтан ауыл, қала үстімен көшеді. Бірақ, топан судың лап бермей, жылғалармен өтуіне бар жағдай жасалып жатыр деді ведомство басшылығы. Одан кейін көктемдегі тағы бір мәселе, өзен-көл бетіндегі мұздың жұқалығын ескермей, адамдардың суға батуы. Бұл жағдай да пысықталды. Сүңгуірлер оқу-жаттығуды Тұрғындар қалашығы жағажайында өткізді. 4 адам да құтқарылды. Екеуі дәрігерлер қолына тапсырылды. Бұл жаттығуға 16 адам мен уаз, газель техникалары жұмылдырылған. Биыл өңірде су басу қаупі бар 43 аумақ анықталған. Көбі аудан, ауылдарда. Сондықтан осы жолы аудандарда өткізілген оқу-жаттығуларға басымдық берілген.