Қаладағы сұйытылған газ құю бекеттерінде әлі де ұзын-сонар кезек. Талонмен ғана қызмет көрсететін бекеттер бүгін қолма-қол ақшаға газ сатып жатыр. Баға әр жерде әртүрлі. Мәселен, Сәңкібай батыр даңғылы бойындағы бекетте газдың литрі 24 теңге. Ал Кеңес Нокин даңғылындағы бекетте 37 теңгеден құйылып жатыр. Кеше ғана облыс әкімдігі, газжелілік ұйымдары және бөлшек сауда нарығының субьектілері үшжақты меморандумға қол қойды. Келісімге сәйкес сұйытылған газ бағасы 37 теңгеден аспауы тиіс. Бірақ, бұл келісім кейбір жеке кәсіпкерлер үшін тоқтам болмай тұр. Жүргізушілердің айтуынша, қала іші шекті бағаны ұстап тұрғанымен, облыс орталығынан шығар жерде орналасқан бекеттерде сұйытылған отын бағасы 40, ал аудандарда 45 теңгеге жеткен. Облыста 22 мыңнан астам көлік сұйытылған газбен жүреді. Және күн өткен сайын көлігін газға ауыстырғандар саны артып келеді. Сұраныс бойынша өңірге айына 5800 тонна газ қажет. Шілдеде 4800 тонна берілсе, тамыз айына 5 мың тонна газ лимиті бөлінеді. Ал бағаны Энергетика министрлігі бекітіп отыр. Апта басында сұйытылған газдың көтерме саудадағы бағасы екі есеге қымбаттады. Бұл шекті баға 30 қыркүйекке дейін сақталады.