Ақтөбеде Қазақстан драма театрларының 24-ші республикалық фестивалі өтіп жатыр. Қала тұрғындары аптаның соңына дейін еліміздің ең мықты театрларының қойылымдарын тегін тамашалау мүмкіндігіне ие. Есінен адасып, қожайынының айтқанынан шықпайтын, еш мақсатсыз ерсілі-қарсылы жүрген жандар. Олардың кім екенін Шыңғыс Айтматовтың "Боранды бекет" романын оқыған көрермен жазбай таниды. Махамбет атындағы Атырау облыстық қазақ драма театры фестивальде әйгілі жазушының "Мәңгүрт" драмасын сахналады. Қоюшы-суретші Тимур Қоесов спектакльді қою кезінде импрессионист-суретші Ван Гогтың "Серуендегі тұтқындар" картинасын негізге алған. Декорациялар, әртістердің киімі, жүріс-тұрысы әйгілі картинаға ұқсас. Басты кейіпкер Едіге де Ван Гогтың кейіпкері секілді қоғамда болып жатқан жайттарға ішкі қарсылығын көрерменге қарап білдіреді. Театрлар фестиваліне ақтөбеліктерді қосқанда сегіз ұжым жиналған. Бүгін кешке сахна қожайындары - Ахтанов атындағы Ақтөбе облыстық драма театры әртістері Гогольдің "Үйлену" комедиясын қояды. Алдағы үш күнге Сейфуллин атындағы Қарағанды театры Дулат Исабековтың "Өкпек жолаушы" драмасын, Қуанышбаев атындағы мемлекеттік академиялық қазақ музыкалық драма театры Антон Чеховтың "Шие" комедиясын, Жантөрин атындағы Маңғыстау театры Уильям Шекспирдің "Гамлет" трагедиясын, Астана қаласының жастар театры "Моцарт" мюзиклін, республикалық неміс драма театры "Рух" спектаклін дайындап отыр.