Ақтөбеде ҰБТ басталды. Бір жыл бойы білімдерін шыңдаған 1146 түлек таңғы сағат 9-да тестілеу аудиторияларына кірді. Облыс орталығында 69 мектептің түлектерінің алды сынақты Қ.Жұбанов атындағы Ақтөбе өңірлік мемлекеттік университеті, С.Бәйішев атындағы Ақтөбе университеті мен №8 орта мектепте тапсырды. ҰБТ талаптары өзгермеген. Жалпы сұрақ саны - 120. 140 балл ең жоғарғы көрсеткіш. Талапкерлер тестілеуден 2 блок бойынша өтеді. Үш тестілеу пунктінің алдындағы жолдар жабылды. Ғимараттарға артық адамның кіруіне рұқсат жоқ. Жағдайды тәртіп сақшылары, жедел жәрдем және өрт сөндіру қызметтерінің мамандары бақылады. Дегенмен, білім мекемелерінің алдында былтырғыдай қарбалас жоқ. Ата-аналар тестілеуді онлайн тәртіпте балалары білім алатын мектептерден қарайды. Тіпті, арнайы бағдарлама арқылы ұялы телефоннан көруге мүмкіндік бар. Бүгінгі тестілеу пункттерінің алдында тек бірен-саран ата-ана жүрді. Қала бойынша ҰБТ әлі 23, 25-маусымда өтеді. Тестілеудің соңғы күні С.Бәйішев атындағы Ақтөбе университетінде ғана сынақ болады. ҰБТ-дан төмен балл жинап немесе қорытындысымен келіспеген түлектер аппеляциялық комиссияға шағымдана алады. Комиссия құрамына қала мектептерінің тәжірибелі, жоғары санатты мұғалімдері кірген. Мамандардың сөзінше, жыл сайын шаһарда орташа балл жинаушылар саны артып келеді. Былтырғы ҰБТ нәтижесінде ең жоғарғы балл 127 болса, орташа балл - 82. Аудандарда ҰБТ ертең басталады.