Ана мен бала өлімі Ақтөбе медицинасының көрсеткішін бұзып тұр. Былтыр біздің облыста төрт әйел жүктілік кезінде қайтыс болған. Әкім мұның себебін бүгін Әсет Қалиевтен сұрады. Қараша айында облыстық аурухананың босану бөлімшесінде көз жұмған Татьяна Соловьеваға бала көтеруге мүлдем тиым салынған екен. Бұрын қатерлі ісігі болған. Дәрігерлер жүктілікті үзуге кеңес бергенімен, әйел тыңдамаған. Обырдан да өлім-жітім көп. Өткен жылы Ақтөбеде мың жарым адамнан қатерлі ісік анықталды. Жартысынан көбі ракпен ауыратынын скринигтен өткен соң бір білген. Бір жақсысы, скринингтің арқасында көп кісінің ауруы ерте сатысында табылып, дер кезінде емдеуге жіберілді. Былтыр денсаулық сақтау саласына бюджеттен 37 миллиард теңге бөлінген. Биыл қаражат бұдан да көп болады. Ақшаның бір бөлігі медициналық нысандардың құрылысына жұмсалады. Осы жылы облыста 15 дәрігерлік амбулатория, көз емдейтін аурухана, балалар тіс емханасы, туберкулезді емдейтін аурухана, жедел жәрдем бекеті салынып бітуі тиіс. 103 қызметі жекенің қолына берілді. Бұл жедел жәрдем қызметінің сапасын арттыру үшін керек, деді облыс әкімі. Аймақта трансплантация қызметі қарқын алып келеді. Өткен жылы облыстық ауруханада 6 бауыр, 18 бүйрек ауыстыру отасы жасалған. Биыл бірінші рет балаға біреудің бауырын салу операциясын өткізу жоспарланып отыр. Дәрігерлер сондай-ақ, өлім хәліндегі адамдардың дене мүшелерін алып, мұқтаж науқастарға беру тәжірибесін бастап көрмек. Бердібек Сапарбаев өзге аймақтарда, тіпті өзге елдерде еңбек етіп жүрген ақтөбелік дәрігерлерді жұмысқа шақыру туралы ұсыныс жасады. Ақтөбеде батыс аймағына ортақ медициналық кластер құрылады.