Ақтөбе былтырғыдай суға кетпейді. "Жағдай қайталанса халыққа көмек көрсетуге дайынбыз" дейді мамандар. Бүгін облыстық азаматтық қорғаныс құрылымдарының көктемгі су тасқынына дайындығы пысықталды. Өңірімізден қыс бойы 260 мың текше метр қар шығарылған. Биыл Ақтөбеде былтырғымен салыстырғанда қар көлемі 2,5 есеге аз. Дегенмен, жерде 80-150 сантиметрге дейін тоң жатыр. Мамандарды алаңдататыны осы. Тоң ерімей жауын жауса, жағдай қиындауы мүмкін. Синоптиктер наурыздың 16-сынан бастап күндіз ауа температурасы көтеріліп, түн салқын болады деп болжап отыр. Мамандардың сөзінше, мұндай ауа райы біраз көмек. Дегенмен, облыста биыл су тасқынына қарсы дайындық ерте басталып, арнайы комиссия құрылды. Облыстық азаматтық қорғаныс жүйесінің 12 мыңнан астам қызметкері, 600-ге жуық техника әзірленіп, қалыпқа келтірілген. Өңіріміздегі үш ірі су қоймасы 50 пайызға дейін толық. Жекенің қолындағы 21 су қоймасы да бақылауда. Барлық елді-мекендердегі арық, су жолдары тазартылған. Аймақтағы 165 гидротехникалық құрылғының жағдайы қанағаттанарлық. Ақтөбедегі 43 елдімекеннің суға кету қаупі бар. Ол жерлерде қазір 12 мыңнан астам адам тұрып жатыр. Суға кету қаупі төнген жағдайда тұрғындар үшін 90 уақытша қоныстандыру орындары дайындалды. 14 мыңнан астам адам сыяды. Жағдай күрделеніп жатса, өзге аймақтардан да көмек келеді.